FHN Bakı, Sumqayıt, Gəncə və 19 rayonda fövqəladə hallarda davranış qaydalarını izah edib

Fövqəladə Hallar Nazirliyi (FHN) əhalini fövqəladə hallarda davranış qaydaları barədə məlumatlandırmaq üçün ölkənin müxtəlif bölgələrində bir sıra maarifləndirmə tədbirləri təşkil edib. Tədbirlərdə nazirliyin regional mərkəzlərinin, Dövlət Yanğın Nəzarəti, Kiçikhəcmli Gəmilərə Nəzarət və Sularda Xilasetmə dövlət xidmətlərinin mütəxəssisləri iştirak ediblər.

Görüşlər Bakı, Sumqayıt və Gəncə şəhərlərində, həmçinin Abşeron, Xızı, Tovuz, Şəmkir, Yevlax, Zərdab, Goranboy, Göyçay, Ucar, Ağdam, Tərtər, Bərdə, Siyəzən, Qusar, Lerik, Cəlilabad, Qax, Qəbələ və Sabirabad rayonlarındakı təhsil müəssisələrində, tibb mərkəzlərində, dövlət qurumlarında və digər təşkilatlarda baş tutub.

İştirakçılara təbii və texnogen fövqəladə hallar, o cümlədən yanğın, zəlzələ və sel zamanı necə davranmaq lazım olduğu izah edilib. Bundan başqa, FHN-in «112» qaynar xəttinin nə üçün nəzərdə tutulduğu açıqlanıb, ilkin yanğınsöndürmə vasitələrindən istifadə qaydası əyani şəkildə göstərilib. İnteraktiv formatda keçən tədbirlərdə iştirakçıların sualları cavablandırılıb.