Milli Məclis aqrar sahə və məhsul şəhadətnaməsi haqqında qanun layihələrini birinci oxunuşda qəbul etdi
Parlament aqrar sektorun idarə olunması və fermerlərin mövsümdən əvvəl maliyyələşməsi üçün yeni qanun layihələrini, həmçinin zabitlərin hərbi rütbədə olma müddətini dəyişən dəyişiklikləri birinci oxunuşda bəyənib.
Milli Məclisin oktyabrın 23-də keçirilən plenar iclasının gündəliyinə 12 məsələ daxil edilmişdi. İclasın əvvəlində Milli Məclisin Sədri Sahibə Qafarova nümayəndə heyətinin oktyabrın 18-20-də Qırğız Respublikasına etdiyi səfər barədə məlumat verib. Sonra deputatlar cari məsələləri, o cümlədən Ermənistanla sülh prosesini müzakirə ediblər.
Gündəliyin ilk məsələsi Hesablama Palatasının auditorunun təyinatı idi. Milli Məclisin Daxili Nizamnaməsinin 44-cü maddəsinin 4-cü hissəsinə və "Hesablama Palatası haqqında" qanunun 11.3-cü maddəsinə görə, bu vəzifəyə təyinatı parlament spikerin təqdimatı əsasında həyata keçirir. Səlahiyyət müddəti başa çatdığı üçün son 7 ildə bu vəzifəni tutan Hafiz İsmayılbəylinin namizədliyi yenidən irəli sürülüb. İqtisadi siyasət, sənaye və sahibkarlıq komitəsinin sədri Azər Əmiraslanov komitənin müsbət rəyini bildirib və qərar layihəsi qəbul olunub.
Deputatlar Beynəlxalq Telekommunikasiya İttifaqının 2023-cü ilin 20 noyabr - 15 dekabr tarixlərində Dubayda keçirilmiş Ümumdünya Radiorabitə Konfransında qəbul olunan "Qismən yenilənmiş Radiorabitə Reqlamenti və onun əlavələri"ni təsdiqləyən qanunu da qəbul ediblər. Beynəlxalq sənəd olduğu üçün qanun bir oxunuşda qəbul edilib. Reqlament radiotezliklərin və peyk orbitlərinin dövlətlər arasında bölgüsünü və koordinasiyasını tənzimləyir. Qanuna əlavə olunan bəyanata görə, İttifaqın hər hansı üzvü qaydalara əməl etmədikdə və ya Azərbaycanın telekommunikasiya xidmətlərinin dayanıqlı işini təhlükə altına qoyduqda Azərbaycan öz maraqlarını qorumaq üçün zəruri tədbirlər görmək hüququnu saxlayır.
İclasda "Dövlət satınalmaları haqqında" qanuna, həmçinin Cinayət və Cinayət-Prosessual məcəllələrinə dəyişikliklər üçüncü oxunuşda qəbul olunub. Əmək Məcəlləsinə və "Aviasiya haqqında" qanuna, "Texniki tənzimləmə haqqında" qanuna, eləcə də "İcra haqqında" və "Qiymətli kağızlar bazarı haqqında" qanunlara dəyişikliklər isə ikinci oxunuşda bəyənilib.
Müdafiə, təhlükəsizlik və korrupsiya ilə mübarizə komitəsinin sədri Arzu Nağıyevin təqdim etdiyi hərbi xidmətlə bağlı dəyişikliklər birinci oxunuşda qəbul edilib. Layihəyə görə, Silahlı Qüvvələrin və digər hərbi orqanların sifarişi ilə magistraturanı (rezidenturanı) bitirmiş, yaxud doktoranturada (adyunkturada) oxuyub elmi dərəcə almış zabitlərin hərbi rütbədə olma müddəti hər təhsil səviyyəsi üzrə bir dəfə 1 il azaldılacaq. "Leytenant" rütbəsində olma müddəti isə 5 illik xüsusi təyinatlı hərbi təhsil müəssisələrinin məzunları üçün 2 il, aviasiyanın uçuş heyətində və sualtı gəmilərdə xidmət edənlər üçün, habelə müvafiq icra hakimiyyəti orqanının müəyyən etdiyi digər hallarda 1 il olacaq.
Prezidentin məktubu ilə parlamentə daxil olan "Aqrar sahə haqqında" qanun layihəsini Aqrar siyasət komitəsinin sədri Tahir Rzayev təqdim edib. Sənəd aqrar sahədə dövlət tənzimləməsinin və dəstəyinin əsaslarını müəyyən edir. Onun məqsədləri arasında ərzaq təhlükəsizliyi, kənd yerlərinin inkişafı, məşğulluğun artırılması və kənddən şəhərə miqrasiyanın azaldılması var. Layihədə torpaq dövlətin qoruduğu əsas istehsal vasitəsi kimi göstərilir, əkin sahələrinin yandırılmasının qarşısının alınması, torpaqların birləşdirilməsi və kooperativləşmənin təşviqi, növbəli əkin, yem payı və minimal kəsim çəkisi kimi məsələlər tənzimlənir. Aqrar kooperativlərə satış məntəqələri açmaq və bazarlarda ticarət yeri əldə etmək hüququ verilir, 30-dan artıq aqrar xidmət ilk dəfə vahid siyahı kimi qanunda təsbit olunur. Bu layihə və ondan irəli gələn, Mülki Məcəlləyə və bir sıra qanunlara dəyişikliklər birinci oxunuşda qəbul edilib.
Sonda "Məhsul şəhadətnaməsi haqqında" qanun layihəsi və onunla bağlı Mülki Məcəlləyə və "İcra haqqında" qanuna dəyişikliklər birinci oxunuşda bəyənilib. Məhsul şəhadətnaməsi fermerin hələ istehsala başlamazdan əvvəl "Elektron kənd təsərrüfatı" sistemi vasitəsilə maliyyə təşkilatlarına və təchizatçılara təklif etdiyi qiymətli kağızdır: istehsalçı əvəzində gələcək məhsulu və ya pul vəsaitini verməyi öhdəsinə götürür. Ödənişin formasından asılı olaraq şəhadətnamə maliyyə və ya əmtəə şəhadətnaməsi ola bilər. Hüquq siyasəti və dövlət quruculuğu komitəsinin sədri Əli Hüseynlinin sözlərinə görə, şəhadətnamənin qiymətli kağız statusu Mülki Məcəllədə təsbit olunacaq, o, həmçinin müstəqil icra sənədi kimi tanınacaq, yəni öhdəlik yerinə yetirilmədikdə birbaşa icraya yönəldilə biləcək.