Salyanın Şorsulu kəndində ildırım düşən evdə yanğın olub

Salyan rayonunun Şorsulu kəndində Maarif Məmmədova məxsus fərdi yaşayış evinə ildırım düşməsi yanğına səbəb olub. Ev sahibinin dediyinə görə, hadisə səhər saat 5 radələrində baş verib, ildırımdan sonra başlayan yanğın qısa vaxtda güclənib.

Yanğını söndürmək üçün Fövqəladə Hallar Nazirliyi Dövlət Yanğından Mühafizə Xidmətinin və Salyan rayon Dövlət Yanğından Mühafizə hissəsinin texnikası və şəxsi heyəti hadisə yerinə göndərilib. Operativ tədbirlərlə alov söndürülüb və onun ətraf ərazilərə yayılmasının qarşısı alınıb.

Hadisədə xəsarət alan olmayıb. Lakin yanğın nəticəsində evin bir otağı içindəki əşyalarla birlikdə yanıb.