Tovuzda avtomobilin vurduğu 46 yaşlı piyada xəstəxanada dünyasını dəyişib
Bakı-Qazax magistral yolunun Tovuz ərazisində "VAZ-2107" markalı avtomobilin vurduğu 46 yaşlı A. Əsgərov xəstəxanada ölüb. Hadisə ilə bağlı araşdırma aparılır.
Tovuz rayonunda Bakı-Qazax magistral yolunun rayon ərazisindən keçən hissəsində ölümlə nəticələnən yol-nəqliyyat hadisəsi qeydə alınıb. Hərəkətdə olan "VAZ-2107" markalı minik avtomobili yolun o biri tərəfinə keçmək istəyən Tovuz rayon sakini, 46 yaşlı A. Əsgərovu vurub.
Ağır vəziyyətdə olan piyada oktyabrın 24-də saat 21:20 radələrində Şəmkir Rayon Mərkəzi Xəstəxanasının Təcili tibbi yardım şöbəsinə gətirilib. Ona kəllə-beyin travması, sağ bazu və mil sümüklərinin, həmçinin çanaq sümüyünün sınığı diaqnozları qoyulub. Həkimlər ilkin tibbi yardım göstərib və reanimasiya tədbirləri həyata keçiriblər.
Bütün səylərə baxmayaraq, xəstənin həyatını xilas etmək alınmayıb: oktyabrın 25-də saat 00:55 radələrində onun ölümü qeydə alınıb. Hadisə yerinə polis əməkdaşları cəlb olunub, faktla bağlı araşdırma aparılır.
