Konstitusiya Məhkəməsi: amnistiya ilə bağışlanan cəza hissəsi qəti cəza hesablanarkən nəzərə alınmamalıdır

Konstitusiya Məhkəməsinin Plenumu sədr Fərhad Abdullayevin sədrliyi ilə keçirdiyi növbəti iclasda Cinayət Məcəlləsinin iki maddəsinin birgə necə tətbiq olunmalı olduğuna dair qərar çıxarıb. Bu barədə məlumatı Konstitusiya Məhkəməsinin Mətbuat xidməti AZƏRTAC-a verib.

İşə Bakı şəhəri Nərimanov Rayon Məhkəməsinin müraciəti əsasında baxılıb. Rayon məhkəməsi Cinayət Məcəlləsinin 66.5-ci və 81.2-ci maddələrinin əlaqəli şəkildə şərh edilməsini, yəni bu normaların bir-biri ilə bağlılıqda necə başa düşülməli olduğunun izah edilməsini istəyib. Məsələ Konstitusiyanın 60-cı və 71-ci maddələrinin tələbləri baxımından araşdırılıb.

Plenum iş üzrə hakim İ.Nəcəfovun məruzəsini, Nərimanov Rayon Məhkəməsinin müraciətini və Milli Məclis Aparatının mülahizəsini dinləyib. Bundan başqa, Ədliyyə Nazirliyi, Ali Məhkəmə, Prokurorluq, Bakı, Sumqayıt və Şirvan apellyasiya məhkəmələri, Naxçıvan Muxtar Respublikasının Ali Məhkəməsi, Vəkillər Kollegiyası, Hüquqi Ekspertiza və Qanunvericilik Təşəbbüsləri Mərkəzinin mütəxəssis mülahizələri, həmçinin ekspert qismində Bakı Dövlət Universitetinin Hüquq fakültəsinin Cinayət hüququ və kriminologiya kafedrasının dosenti M.Bayramovanın rəyi öyrənilib.

Qərara əsasən, Cinayət Məcəlləsinin 66.5-ci maddəsi ilə qəti cəza təyin edilərkən şəxsin amnistiya nəticəsində çəkməkdən azad olunduğu cəza hissəsi cəzaların toplanması və əhatə edilməsi prosesinə daxil edilməməlidir. Sadə dillə desək, məhkəmə bir neçə cəzanı birləşdirib yekun cəzanı müəyyən edərkən dövlətin amnistiya aktı ilə artıq bağışlanmış hissəni yenidən hesablamaya qatmamalıdır. Plenum bu nəticəyə Konstitusiyanın 60-cı maddəsinə, 71-ci maddəsinin I və X hissələrinə, Cinayət Məcəlləsinin 66 və 81-ci maddələrinə, eləcə də qərarın təsviri-əsaslandırıcı hissəsindəki hüquqi mövqelərə istinadən gəlib.

Qərar dərc olunduğu gündən qüvvəyə minir və qətidir. Onu heç bir orqan və ya şəxs ləğv edə, dəyişdirə və ya rəsmi təfsir edə bilməz. Bu o deməkdir ki, məhkəmələr oxşar işlərdə bu izaha əməl etməlidir.