Prezident: İşğal illərində sərvətlərimizin qanunsuz istismarından gələn gəlir beynəlxalq kanallarla leqallaşdırılıb
İlham Əliyev İƏT ölkələrinin korrupsiyaya qarşı orqanlarına müraciətində işğal dövründə təbii sərvətlərin talanını və süni intellektin yaratdığı yeni korrupsiya risklərini vurğulayıb.
Prezident İlham Əliyev bildirib ki, Azərbaycan torpaqlarının təxminən 30 il davam edən işğalı zamanı ölkənin təbii sərvətləri, o cümlədən faydalı qazıntı yataqları xarici subyektlərin iştirakı ilə qanunsuz istismar olunub və bu, regionun ekologiyasına ciddi zərər vurub.
Dövlət başçısının sözlərinə görə, bu cinayətlərdən əldə olunan böyük həcmdə gəlir beynəlxalq maliyyə kanalları vasitəsilə leqallaşdırılıb, yəni qanuni mənşəli pul kimi göstərilərək dövriyyəyə buraxılıb. Bu fikirlər Prezidentin Bakıda keçirilən İslam Əməkdaşlıq Təşkilatına (İƏT) üzv dövlətlərin korrupsiyaya qarşı mübarizə aparan orqanları rəhbərlərinin üçüncü yüksək səviyyəli görüşünün iştirakçılarına ünvanladığı müraciətdə yer alıb.
Müraciətdə qeyd olunub ki, rəqəmsal inkişaf və xüsusilə süni intellektin sürətlə yayılması korrupsiyaya qarşı mübarizənin imkanlarını artırsa da, eyni zamanda korrupsiyanın yeni formalarının yaranmasına və rəqəmsal maliyyə alətlərindən sui-istifadəyə zəmin yaradır.
«Müvafiq hüquq mühafizə orqanlarının müasir texnoloji həllərin potensialından səmərəli yararlanması bu cür cinayətlərin qarşısının alınmasında və effektiv araşdırılmasında xüsusi əhəmiyyət kəsb edir»
İlham Əliyev, Azərbaycan Respublikasının Prezidenti
