Xətai rayonundakı restoranda qətldən sonra cinayətkar birlik üzvü olmaqda şübhəli 11 nəfər həbs edilib
Baş Prokurorluq və DİN-in istintaq qrupu Bakının Xətai rayonunda 43 yaşlı kişinin bıçaqla öldürülməsini planlı şəkildə təşkil etməkdə şübhəli bilinən 11 nəfəri həbs edib. Onların cinayətkar birlik yaratdıqları müəyyən olunub.
Oktyabrın 23-də, saat 00:10 radələrində Bakının Xətai rayonunda, General Şıxlinski küçəsindəki restoranlardan birində 43 yaşlı C.Mirağayev bıçaqla xəsarət alaraq həyatını itirib.
Baş Prokurorluq və Daxili İşlər Nazirliyinin birgə istintaq qrupu hadisə ilə bağlı əməliyyat-axtarış tədbirləri keçirib. Nəticədə qətlin əvvəlcədən planlaşdırılaraq təşkil edilməsində iştirak etdikləri müəyyən olunan 11 nəfər həbs edilib. Onlardan Ramil Dadaşov, Eldar Eldarov, Əhməd Əlizadə, İsmayıl Kazımov, Həsən Zülfüqarov, Fərid Əyyublu və Xəyyam Səfixanov daha əvvəl də məhkum olunublar. Həbs edilənlər arasında həmçinin Mikayıl İsmayılov, Kamran Əfəndiyev, Elvin Səfərov və Elmar Nuriyev var.
İstintaqın məlumatına görə, bu şəxslər cinayətkar aləmin qaydaları ilə yaşayıb, mütəmadi olaraq qanunsuz fəaliyyətlə məşğul olublar. Onların kriminal araşdırmalar apararaq hədə-qorxu ilə pul tələb etmək, cinayətkar dairələrdə nüfuz qazanmaq və tələblərinə tabe olmayanları sərt cəzalandırmaq məqsədilə cinayətkar birlik yaratdıqları və onun fəaliyyətində iştirak etdikləri müəyyən edilib. Bildirilir ki, bu məqsədlə odlu və soyuq silahlardan istifadə edilməklə insanların sağlamlığına qəsdən ağır zərər vurulub.
Cinayətkar birlik qanunda bir neçə nəfərin ağır və ya xüsusilə ağır cinayətlər törətmək üçün yaratdığı mütəşəkkil qrup kimi nəzərdə tutulur. Fakt üzrə Cinayət Məcəlləsinin müvafiq maddələri ilə cinayət işi başlanıb.
Hazırda işin bütün hallarını, saxlanılanların hər birinin cinayətdəki rolunu, eləcə də cinayətkar birliyin fəaliyyət istiqamətlərini və əlaqələrini müəyyən etmək üçün əməliyyat-istintaq tədbirləri davam etdirilir.
