Milli Kibertəhlükəsizlik Agentliyi WhatsApp hesablarının ələ keçirilməsi barədə xəbərdarlıq edib

Rəqəmsal İnkişaf və Nəqliyyat Nazirliyinin tabeliyində fəaliyyət göstərən Milli Kibertəhlükəsizlik Agentliyi (MKA) WhatsApp və WhatsApp Business istifadəçilərinə xəbərdarlıq edib. Agentliyin məlumatına görə, kiberdələduzlar bu tətbiqlərdəki hesabları fəal şəkildə ələ keçirir. MKA vətəndaşları riskləri azaltmaq üçün gecikmədən tədbir görməyə çağırır.

İlk addım tətbiqdəki “Bağlı cihazlar” bölməsini yoxlamaq və tanınmayan bütün cihazlardan çıxış etməkdir. Agentlik vurğulayır ki, hesab sahibin öz telefonunda normal işləsə belə, eyni vaxtda başqa cihazdan da istifadə oluna bilər. Bundan əlavə, “Parametrlər” bölməsindən ikimərhələli təsdiqləməni, yəni girişə əlavə qoruma qatını aktivləşdirmək və hesabın bərpası üçün etibarlı elektron poçt ünvanı əlavə etmək tövsiyə olunur.

İstifadəçilər SMS ilə gələn təsdiq kodlarını, cihaz bağlama kodlarını və təhlükəsizlik PIN-kodunu heç kimə verməməli, özlərinin başlatmadığı giriş sorğularını təsdiqləməməlidir. “Hesabınız bağlanacaq”, “biznes hesabınızı təsdiqləyin” kimi mesajlara və ya “dəstək xidməti” adından göndərilən keçidlərə inanmamaq, QR-kodları isə yalnız rəsmi platformalarda skan etmək lazımdır. Tətbiqlər yalnız rəsmi mağazalardan yüklənməli, tətbiq və telefon vaxtında yenilənməli, bildirişlər açıq saxlanılaraq yeni cihaz bağlantıları izlənməlidir.

Biznes hesablarına gəldikdə, agentlik yalnız səlahiyyətli işçilərin cihazlarının bağlı qalmasını və işdən çıxan şəxslərin girişinin dərhal ləğv edilməsini məsləhət görür. Müdaxilədən şübhələnən istifadəçi naməlum cihazlardan çıxış etməli, hesaba girişi itiribsə, nömrəsini rəsmi tətbiqdə yenidən qeydiyyatdan keçirməli və tanışlarını onun adından gələ biləcək saxta müraciətlər barədə xəbərdar etməlidir.

MKA xatırladır ki, yalnız ikimərhələli təsdiqləməni aktivləşdirmək artıq mövcud olan icazəsiz girişi avtomatik aradan qaldırmır. Buna görə bağlı cihazların ayrıca yoxlanılması mütləqdir.